Bakı. Trend:

Rusiyada Moskva və Moskva vilayəti yüzlərlə dronun hücumuna məruz qalıb. Hücumlar nəticəsində azı iki nəfər ölüb, mühüm neft emalı zavoduna ziyan dəyib. Hadisə Rusiyada parlament seçkilərinin son günündə baş verib.

Bu barədə Rusiya rəsmiləri məlumat veriblər.

Moskva vilayətinin qubernatoru Andrey Vorobyov 249 dronun vurulduğunu və bir neçə yaşayış məntəqəsində dağıntıların qeydə alındığını bildirib. “Hücum davam edir”, - deyə o, Bakı vaxtı ilə səhər saatlarında Teleqram-da yazıb.

Rəsmi məlumata görə, iki ayrı ərazidə 44 yaşlı qadın və yaşlı kişi olmaqla, ümumilikdə iki nəfər ölüb. Üçüncü yaşayış məntəqəsində isə dronun yaşayış binasına düşməsi nəticəsində baş verən yanğın səbəbindən 400 nəfər təxliyə edilib.

Moskva meri Sergey Sobyanin gecə ərzində Teleqram-da paylaşdığı bir sıra məlumatlarda Rusiyanın hava hücumundan müdafiə sistemləri tərəfindən azı 186 pilotsuz uçuş aparatının vurulduğunu bildirib. O, dronların mənşəyini açıqlamayıb.

“‘Moskva Neft Emalı Zavodu’nun ərazisindəki bir obyektə ziyan dəyib”, - deyə Sobyanin bildirib. Onun sözlərinə görə, ilkin məlumata əsasən, zavodda zərərçəkən olmayıb və hadisə yerində xilasetmə xidmətləri işləyir.

Yeni hücumlar Rusiyada parlament seçkilərinin üçüncü və son günündə baş verib. Seçkilərin prezident Vladimir Putinin partiyasının qələbəsi ilə başa çatacağı gözlənilir.

Hücumlar ABŞ Prezidenti Donald Trampın bazar ertəsi Ukrayna və Rusiyanın bir-birinin enerji infrastrukturuna zərbə endirməmək barədə razılığa gəldiyini bildirməsindən sonra baş verib.

Ukrayna Prezidenti Volodimir Zelenski Rusiya da eyni addımı atacağı təqdirdə Ukraynanın “gərginliyin azaldılması tədbirləri” görməyə hazır olduğunu bildirib. Kreml isə bu təklifi “yaxşı fikir” adlandırıb.

Zelenskinin gələn həftə Nyu-Yorkda Trampla görüşməsi planlaşdırılır. O, Rusiyada parlament seçkilərindən sonra birbaşa danışıqların bərpa olunacağına ümid etdiyini bildirib.