Bakı. Trend:

ABŞ Prezidenti Donald Tramp Hörmüz boğazının adını öz şərəfinə dəyişdirmək istədiyini bir daha bəyan edib.

“Düşünürəm ki, onun adını Tramp boğazı qoyacağıq. Meksika körfəzinin adını Amerika körfəzi ilə əvəz etdik, möhtəşəm Ontario gölünün adını isə Amerika gölü qoyduq. Düşünürəm ki, müəyyən vaxtda Hörmüz boğazını Tramp boğazı adlandıracağıq”, – deyə o, ABŞ Konqresinə aralıq seçkiləri ərəfəsində Ohayo ştatında Respublikaçılar Partiyasının tərəfdarları qarşısında çıxışı zamanı bildirib.

“Bizim körfəzimiz var, gölümüz var, bəlkə də boğazımız olacaq. Sizcə, mən zarafat edirəm? Meksika körfəzinin adını Amerika körfəzi ilə əvəz edəndə hamı bunun zarafat olduğunu düşünürdü. Hamı deyirdi ki, bu, çox gülməlidir. Amma mən dedim ki, bunu həqiqətən edəcəyəm”, – deyə ABŞ Prezidenti əlavə edib.

Tramp həmçinin bildirib ki, hazırda Hörmüz boğazından “yeddi ay əvvəlkindən daha çox neft keçir”. O, İranla münaqişə başa çatdıqdan sonra benzin və neft qiymətlərinin aşağı düşəcəyini vəd edib.

Qeyd edək ki, daha əvvəl ABŞ lideri Meksika körfəzi və Ontario gölünün adlarının müvafiq olaraq Amerika körfəzi və Amerika gölü ilə əvəz edilməsini nəzərdə tutan fərmanlar imzalayıb. Bu sərəncamlar federal hökumətin həmin coğrafi obyektləri necə adlandırmasına və federal xəritələrdə onların necə göstərilməsinə təsir edir. Bununla belə, Trampın prezidentlik müddəti başa çatdıqdan sonra onu əvəz edən prezidentlər bu dəyişiklikləri ləğv edən fərmanlar imzalaya bilərlər.