Bakı. Trend:

Bu il yanvarın 1-nə Azərbaycan Dövlət Neft Fondunun (ARDNF) qızıl külçələrə investisiyalarının dəyəri 47 milyard 707,46 milyon manat təşkil edib.

Trend-in Fondun maliyyə hesabatına istinadən apardığı hesablamalara görə, bu, 2025-ci il yanvarın 1-nə olan göstərici ilə müqayisədə təxminən 2,3 dəfə çoxdur. Belə ki, 2025-ci ilin əvvəlində ARDNF-in qızıl külçələrə investisiyalarının dəyəri 21 milyard 82,767 milyon manat olub.

Beləliklə, bir il ərzində Fondun qızıl aktivlərinin dəyəri 26 milyard 624,693 milyon manat artıb. Bu, qızılın Fondun investisiya portfelindəki mövqeyinin əhəmiyyətli dərəcədə gücləndiyini göstərir.

Hesabatda əks olunan digər göstəricilər də ARDNF-in investisiya portfelində qızılın xüsusi çəkisinin yüksəldiyini təsdiqləyir. Belə ki, qızıl külçələrin Fondun ümumi aktivlərindəki payı 2025-ci il yanvarın 1-dəki 20,5 faizdən 2026-cı il yanvarın 1-nə 37,9 faizə çatıb. Nəticədə qızılın aktivlərdəki payı bir il ərzində 17,4 faiz bəndi artıb.

Bu dəyişiklik Fondun investisiya aktivlərinin strukturunda qızılın rolunun daha da artdığını göstərir. Qızılın ümumi aktivlərdəki payının 37,9 faizə yüksəlməsi onun ARDNF-in investisiya portfelində əsas istiqamətlərdən birinə çevrildiyini deməyə əsas verir.

Qızıl investisiyalarının dəyəri digər aktivlərlə müqayisədə necə dəyişib?

ARDNF-in maliyyə hesabatına əsasən, Fondun investisiya portfelində qızıl külçələrlə yanaşı, istiqrazlar, səhm investisiyaları, daşınmaz əmlak, infrastruktur və özəl səhm fondları, eləcə də digər maliyyə alətləri yer alır.

2025-ci ildə Fondun investisiya fəaliyyətindən əldə etdiyi gəlirlərin artmasında qızıl investisiyaları mühüm rol oynayıb. Belə ki, ötən il qızıl külçə investisiyaları üzrə gəlirlər 16 milyard 849,884 milyon manat təşkil edib. Bu göstərici 2024-cü ildə 3 milyard 385,708 milyon manat olub. Beləliklə, qızıl investisiyalarından əldə edilən gəlirlər bir il ərzində təxminən 5 dəfə artıb.

Qızıl investisiyalarından əldə olunan gəlirlərin yüksəlməsi Fondun ümumi maliyyə nəticələrinə də əhəmiyyətli təsir göstərib. ARDNF 2025-ci ili 26 milyard 913,177 milyon manat xalis mənfəətlə başa vurub. Bu, 2024-cü ilin nəticəsi ilə müqayisədə təxminən 3,4 dəfə çoxdur.

Qeyd edək ki, investisiya aktivlərinin hesabat dəyərinin artması ilə həmin aktivlərdən əldə edilən gəlirlər bir-biri ilə əlaqəli olsa da, eyni göstərici deyil. Aktivlərin dəyəri hesabat tarixinə portfelin qiymətləndirilməsini, investisiya gəlirləri isə müvafiq dövr ərzində maliyyə nəticələrinə təsir edən gəlirləri əks etdirir.

ARDNF-in aktivləri 125,7 milyard manata çatıb

2026-cı il yanvarın 1-nə ARDNF-in ümumi aktivləri 125 milyard 720,247 milyon manat təşkil edib. Bu, 2025-ci ilin əvvəli ilə müqayisədə 22,5 faiz çoxdur.

Həmin tarixə Fondun balans kapitalı 125 milyard 248,559 milyon manat, öhdəlikləri isə 471,688 milyon manat olub. İl ərzində balans kapitalı 22,5 faiz, öhdəliklər isə 11,3 faiz artıb.

Ümumi aktivlərin artması fonunda qızıl külçələrin dəyərinin 47,7 milyard manatı ötməsi və onların aktivlərdəki payının 37,9 faizə yüksəlməsi Fondun investisiya portfelində baş verən əsas dəyişikliklərdəndir.

Xatırladaq ki, Azərbaycan Dövlət Neft Fondu Prezidentin 29 dekabr 1999-cu il tarixli fərmanı ilə yaradılıb. Fondun əsas vəzifəsi Azərbaycan vətəndaşlarının bugünkü və gələcək nəsillərinin mənafeyi naminə ölkənin neft-qaz ehtiyatlarının kəşfiyyatı və işlənməsindən, eləcə də qurumun öz fəaliyyətindən əldə olunan gəlirlərin və digər vəsaitlərin toplanmasını və səmərəli idarə olunmasını təmin etməkdir.