Bakı. Trend:

Avqust ayında Azərbaycanda yerli kartlarla aparılan əməliyyatların həcmi 23 faiz artıb.

Azərbaycan Mərkəzi Bankının (AMB) dərc etdiyi statistik bülletendə bildirilir ki, bu ilin avqust ayının sonuna Azərbaycanda rezident maliyyə təşkilatları tərəfindən emissiya edilmiş yerli kartlardan (həmçinin statistik vahidin ödəniş kartlarından) istifadə etməklə 66 min əməliyyat həyata keçirilib. Qeyd olunur ki, bu əməliyyatların həcmi 76,7 milyon manatı ötüb.

Bankın məlumatına görə, ötən ilin eyni dövrü ilə müqayisədə yerli kartlardan istifadə etməklə aparılan əməliyyatların sayı 7,2 mindən çox və ya 12,2 faiz, əməliyyatların həcmi isə 14,2 milyon manatdan çox və ya 22,7 faiz artıb.

Qeyd edək ki, Azərbaycanda bankların və “Azərpoçt” MMC-nin dövriyyədə olan ödəniş kartlarının sayı avqust ayının sonuna 22 milyon 974 minə çatıb.

Azərbaycan Mərkəzi Bankının (AMB) məlumatına görə, bu göstərici iyul ayının sonu ilə müqayisədə 189 min ədəd və ya təxminən 0,8 faiz artıb. Ötən ilin eyni dövrü ilə müqayisədə dövriyyədə olan ödəniş kartlarının sayı 8,7 faiz artıb.

Kartların strukturu da dəyişib: debet kartlarının sayı illik ifadədə 10,2 faiz artıb, kredit kartlarının sayı isə 4,3 faiz azalıb.

Nağdsız ödənişlərin artımı davam edib. 2026-cı ilin avqust ayında ödəniş kartları vasitəsilə həyata keçirilən ölkədaxili nağdsız əməliyyatların həcmi 8 milyard 888 milyon manat təşkil edib. Bu məbləğin 7 milyard 682 milyon manatı elektron ticarətin, 1 milyard 204 milyon manatı POS-terminalların, 2 milyon manatı isə özünəxidmət terminalları və bankomatların payına düşüb.