Bakı. Trend:

Azərbaycan Mərkəzi Bankı (AMB) “Rabitəbank” ASC-yə icrası məcburi sərəncam verib, “Bank of Baku” ASC-nin vəzifəli şəxsi isə 10 min manat məbləğində cərimələnib.

Bu barədə AMB məlumat yayıb.

Məlumata görə, “Rabitəbank” ASC tərəfindən “Kredit təşkilatları, ödəniş təşkilatları və elektron pul təşkilatlarında kassa əməliyyatlarının aparılması, nağd pul və digər qiymətlilərin saxlanması və inkassasiyası Qaydası”nın 3.20-ci bəndinin tələblərinə riayət edilməyib.

Bununla əlaqədar “Banklar haqqında” Azərbaycan Respublikasının Qanununun 47.4-cü maddəsinin tələbləri rəhbər tutulmaqla AMB tərəfindən “Rabitəbank” ASC-yə icrası məcburi sərəncam verilib.

Sərəncamda qeyd olunan halların gələcəkdə təkrarlanmaması məqsədilə bankın daxili nəzarət sistemlərinin gücləndirilməsi və bununla bağlı zəruri tədbirlərin görülməsi tələb olunur.

Bununla yanaşı, AMB-nin cari nəzarət prosesləri çərçivəsində “Bank of Baku” ASC-nin vəzifəli şəxsi inzibati məsuliyyətə cəlb olunub.

Belə ki, cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında qanunvericiliyin tələblərinin pozulması ilə əlaqədar Bakı şəhəri Nərimanov Rayon Məhkəməsi tərəfindən “Bank of Baku” ASC-nin vəzifəli şəxsi İnzibati Xətalar Məcəlləsinin 598.1.1-ci maddəsinə əsasən 10 min manat məbləğində cərimə edilib.

AMB-nin açıqlamasında “Rabitəbank” üzrə konkret pozuntunun hansı formada baş verdiyi və sərəncamın icrası üçün müddət barədə əlavə məlumat verilməyib.

Beləliklə, Mərkəzi Bankın cari nəzarət tədbirləri çərçivəsində iki bankla bağlı fərqli xarakterli tədbirlər görülüb. “Rabitəbank”a verilən sərəncam kassa əməliyyatları üzrə müəyyən edilmiş tələblərin pozulması və daxili nəzarət sistemlərinin gücləndirilməsi ilə, “Bank of Baku”nun vəzifəli şəxsinin cərimələnməsi isə cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə üzrə qanunvericiliyin tələblərinin pozulması ilə bağlıdır.