Bakı.Trend:

İş üçün noutbuk seçərkən onun gündəlik tapşırıqlara necə təsir edəcəyini anlamaq vacibdir. Böyük cədvəl tez açılacaqmı, akkumulyator ardıcıl bir neçə görüşə tab gətirəcəkmi, monitoru və proyektoru adapter olmadan qoşmaq mümkün olacaqmı, sistem şirkətin sənədlərini qoruya biləcəkmi? Məhz bu suallar seçimin uğurlu olub-olmayacağını müəyyənləşdirir. Əks halda, cəmi bir ildən sonra cihazın sahibinə yeni noutbuk axtarmaq lazım gələ bilər.

ASUS ExpertBook P5 G2 uzunmüddətli iş və müntəzəm səfərlər üçün hazırlanıb. Bu icmalda modelə kimin diqqət yetirməli olduğunu, AMD platformasının hansı üstünlükləri verdiyini və daha yüksək səviyyəli konfiqurasiyanın hansı hallarda seçilməsinin məqsədəuyğun olduğunu nəzərdən keçirəcəyik.

“ASUS ExpertBook P5 G2”-nin əsas xüsusiyyətləri

Parametrlər

Texniki xüsusiyyətləri

Əməliyyat sistemi

Windows 11 Pro və ya Windows 11 Home

Prosessor

AMD Ryzen AI 9 HX-ə qədər, 12 nüvəyə və 24 axına qədər, tezlik 5,2 QHs-ə qədər

Neyron bloku

AMD XDNA, 55 TOPS-a qədər

Qrafika

MD Radeon 890M-ə qədər

Ekran

14 düym, 16:10 formatı; 2.5K-a qədər təsvir ölçüsünə və 144 Hs-ə qədər yenilənmə tezliyinə malik OLED və ya IPS

Əməli yaddaş

96 QB-a qədər ( DDR5)

Fiziki yaddaş

İki M.2 PCIe 4.0 yuvası, ümumi tutum 3 TB-a qədər

Simsiz rabitə

Wi-Fi 7 və ya Wi-Fi 6E, Bluetooth

Portlar

USB 4, USB-C, iki USB-A, HDMI 2.1, audio çıxışı və RJ-45

Akkumlyator

70 Vt·saatadək, 49 dəqiqəyə 60%-dək sürətli enerji yığma

Ölçülər

312 × 227 × 18 mm

Çəki

Konfiqurasiyadan asılı olaraq təxminən 1,36 kq

“Expert P” seriyasında bu noutbuk ən yüksək mövqedə qərarlaşır. Seriya sahibkarlar, kiçik və orta biznes üçün nəzərdə tutulub, P5 modeli isə ən geniş imkanlar dəstini təqdim edir. Bizim fikrimizcə, onun əsas üstünlüyü mobillik, məhsuldarlıq, genişləndirilə bilən yaddaş və biznes funksiyalarının uğurlu vəhdətindədir. Belə kompüterdən bir neçə il istifadə etmək, yaddaş və məlumat saxlama tutumunu tədricən artırmaq mümkündür.

Təxminən 1,36 kq çəki və 18 mm-ə qədər qalınlıq noutbuku hər gün görüşlərə aparmağa imkan verir. Metal korpus lazımi möhkəmliyi təmin edir, MIL-STD 810H standartına uyğunluq isə tez-tez səfər edənlər üçün əlavə etibarlılıq yaradır. Sınaqlar vibrasiya, zərbə, temperatur dəyişiklikləri, rütubət və tozun təsirini ehtiva edir.

14 düymlük format səyyar əməkdaşlar üçün əlverişlidir. Noutbuk çantada, eləcə də kafedə və ya hava limanında masanın üzərində az yer tutur. Qapaq 180 dərəcə açılır, buna görə təqdimat zamanı ekranı müştəriyə tərəf çevirmək mümkündür. Vaxtının böyük hissəsini ofisdə keçirən istifadəçilərə xarici monitor qoşmağı məsləhət görürük. Modelin portları tam funksional iş yeri yaratmağa imkan verir.

“ExpertBook P5 G2”nin əsas üstünlüyü yeni “AMD Ryzen AI 400” platforması ilə bağlıdır. Noutbuk “AMD Ryzen AI 9 HX”-ə qədər prosessorlarla təchiz edilir. Yüksək səviyyəli versiyada 12 nüvə, 24 axın, 5,2 QHs-ə qədər tezlik, Radeon 890M qrafik prosessoru və ayrıca AMD XDNA neyron bloku var.

Belə platformanın üstünlüyü eyni vaxtda bir neçə proqramla işləyərkən xüsusilə nəzərə çarpır. Məsələn, videokonfrans, onlarla açıq vərəqi olan brauzer, böyük cədvəl, korporativ messencer və təqdimat paralel şəkildə işləyə və sistemin sürətli reaksiyasını qoruyub saxlaya bilər. Rəhbər, analitik, satış meneceri və ya biznes sahibi üçün bu sürət daha az gözləmə və gün ərzində daha rahat iş deməkdir.

AMD platforması yüklənməni mərkəzi prosessor, inteqrasiya olunmuş qrafika və süni intellekt sürətləndiricisi arasında bölüşdürür. Radeon 890M təsvirin göstərilməsinə, videonun nümayişinə və xarici displeylərlə işləməyə cavabdehdir. Onun imkanları təqdimatlar, fotoşəkillərin işlənməsi, yüngül video montajı və bir neçə monitorun qoşulması üçün kifayətdir. Biznes və yaradıcı tapşırıqların əksəriyyəti inteqrasiya olunmuş qrafikanın imkanları hesabına yerinə yetirilir.

AMD XDNA neyron bloku 55 TOPS-ə qədər məhsuldarlıq təmin edir və nitqin tərcüməsi, təsvirin işlənməsi, səs-küyün azaldılması və süni intellektə əsaslanan digər tapşırıqları öz üzərinə götürür. Əməliyyatların bir hissəsi lokal şəkildə yerinə yetirilir ki, bu da işi sürətləndirir və akkumulyatorun enerjisindən daha səmərəli istifadə etməyə kömək edir.

“AMD Ryzen AI 9 HX” prosessorlu yüksək səviyyəli konfiqurasiyanı böyük cədvəllər, analitik proqramlar, virtual maşınlar, çoxsaylı tablar və lokal süni intellekt funksiyaları ilə işləyənlərin seçməsi məsləhətdir. Elektron poçt, CRM, sənədlər və standart ofis tapşırıqları üçün “Ryzen AI 7” və ya “Ryzen AI 5” prosessorlu versiya kifayət edəcək. Qənaət olunan vəsaiti daha böyük yaddaş tutumuna və ya uyğun ekran tipinə yönəltmək olar.

Yeri gəlmişkən, ExpertBook P5 G2 məşhur Copilot+ PC kateqoriyasına daxildir. İstifadəçi nitqin tərcüməsi ilə “Live Captions”, “Windows Studio Effects”, ağıllı axtarış və “Windows 11”in digər alətləri kimi süni intellekt funksiyalarını əldə edir. Onların üstünlükləri beynəlxalq zənglər, tez-tez keçirilən videokonfranslar və böyük həcmdə informasiya ilə iş zamanı xüsusilə nəzərə çarpır.

“ASUS MyExpert” tətbiqi bu imkanlar dəstini daha da genişləndirir. Məsələn, “AI ExpertMeet” görüşü qeydə ala, çıxış edən şəxsləri tanıya, söhbətin qısa məzmununu hazırlaya və qarşıda duran tapşırıqların siyahısını tərtib edə bilər. Gündə bir neçə iclas keçirən əməkdaş üçün belə funksiya həftə ərzində saatlarla vaxta qənaət edə bilər.

“Knowledge Hub” sənədləri təhlil etməyə, qısa xülasələr əldə etməyə və lazımi məlumatları tapmağa kömək edir, “File Search” isə lokal və bulud faylları üzrə vahid axtarış imkanı yaradır. Bu alətlər böyük material arxivi ilə işləyən hüquqşünaslar, analitiklər, məsləhətçilər və rəhbərlər üçün faydalı olacaq.

Gördüyümüz kimi, süni intellekt artıq ExpertBook P5 G2 seçmək üçün səbəblərdən birinə çevrilir. Noutbuk “Copilot+ PC” standartlarına uyğundur, ASUS-un öz alətlərindən istifadə edir və gələcək yeniləmələr üçün kifayət qədər məhsuldarlıq ehtiyatına malikdir. Şirkət “Windows” və “MyExpert” sistemlərinin inkişafı ilə birlikdə yeni iş funksiyalarını mənimsəyə biləcək bir cihaz əldə edir.

“ExpertBook P5 G2” üçün müxtəlif 14 düymlük ekran variantları təklif olunur. 100% DCI-P3 rəng məkanını əhatə edən OLED ekran təqdimatlar hazırlayan, fotoşəkilləri redaktə edən və vizual materiallarla işləyənlər üçün daha uyğundur. Dərin qara rəng, yüksək kontrast və doymuş çalarlar nəzərəçarpacaq üstünlük yaradır.

2.5K-a qədər təsvir ölçüsünə, 144 Hs yenilənmə tezliyinə və parıltı əleyhinə örtüyə malik IPS panel sənədlər və cədvəllərlə uzunmüddətli iş üçün əlverişlidir. 16:10 formatı şaquli istiqamətdə daha çox iş sahəsi təmin edir və ekranda daha çox mətn sətrinin yerləşməsinə imkan verir. 144 Hs tezlik səhifələrin hamar sürüşdürülməsini və interfeysin sürətli reaksiyasını təmin edir.

Modelin ən güclü tərəflərindən biri portlar dəstidir. Korpusda USB 4, ikinci tam funksional USB-C, iki USB-A, HDMI 2.1, audio çıxışı və RJ-45 portu var. Noutbuka proyektor, simli şəbəkə, yaddaş qurğuları və adi ofis periferik cihazları qoşmaq mümkündür. Üçədək 4K xarici monitorun dəstəklənməsi analitika, maliyyə tapşırıqları və bir neçə layihənin idarə olunması üçün rahat iş məkanı yaratmağa imkan verir.

İki əməli yaddaş yuvası 96 QB DDR5-ə qədər yaddaşı dəstəkləyir. İki M.2 yuvası əlavə SSD quraşdırmağa imkan verir. Bu, kompüteri bir neçə il istifadə etmək istəyənlər üçün “ExpertBook P5 G2” yə diqqət ayırmaq üçün ciddi səbəbdir. Yük artdıqca istifadəçi yaddaş və məlumat saxlama tutumunu artıra və beləliklə, cihazın özünü dəyişmədən ondan daha uzun müddət yararlana bilər.

70 Vt/ saatadək tutuma malik akkumulyator uzunmüddətli iş üçün nəzərdə tutulub. “PCMark 10 Modern Office” testində əldə edilən 22,5 saata qədər nəticə yüngül ofis ssenarisini əks etdirir. Videozənglər, yüksək ekran parlaqlığı və ağır proqramlar enerji sərfiyyatını artıracaq. Akkumulyatorun tutumu tam iş günü üçün kifayət etməlidir, 49 dəqiqəyə 60%-dək sürətli enerji yığma isə noutbuku növbəti görüşə tez hazırlamağa kömək edəcək.

ASUS ExpertBook P5 G2 sistemi də xüsusi diqqətə layiqdir. Buraya BIOS mühafizəsi, TPM 2.0, “Secured-core PC” texnologiyaları və FIDO2 dəstəyi ilə barmaq izi vasitəsilə giriş daxildir. İstehsalçı BIOS və drayverlər üçün beş il təhlükəsizlik yeniləməsi vəd edir. Biznes üçün bu, cihazın daha uzun xidmət müddəti və texniki dəstəyə daha az xərc deməkdir.

“AMD Ryzen AI 9 HX” prosessorlu konfiqurasiya yüksək yüklənmə, aktiv çoxvəzifəlilik və süni intellektdən müntəzəm istifadə zamanı özünü doğruldacaq. Standart ofis işləri üçün daha böyük yaddaş tutumuna malik, daha münasib qiymətli prosessor məntiqli seçim olacaq. OLED ekran qrafika və təqdimatlar üçün, 2.5K IPS isə sənədlər, cədvəllər və uzunmüddətli iş üçün seçilməlidir.

“ExpertBook P5 G2” güclü AMD platforması, böyük genişləndirmə imkanları, tammiqyaslı port dəsti və biznes səviyyəli mühafizəsi sayəsində diqqətə layiqdir. Alıcı ona sahib olmaqla səfərlərə apara, ofis infrastrukturu ilə birləşdirə və şirkətin artan tələblərinə uyğunlaşdıra biləcəyi bir iş aləti əldə edir.