Bakı. Trend:

Konqo Demokratik Respublikasında (KDR) təsdiqlənmiş Ebola hallarının sayı 7 000-i keçib, təxminən 3 400 nəfərin öldüyü bildirilir. Bu barədə cümə günü yayımlanan hökumətin son vəziyyət hesabatında məlumat verilib.

Sentyabrın 10-na olan məlumata görə, səhiyyə orqanları 7 022 təsdiqlənmiş yoluxma və 3 398 ölüm halı qeydə alıb. Beləliklə, xəstəlikdən ölüm göstəricisi 48,4 faiz təşkil edib. Ümumilikdə 1 671 xəstə sağalıb.

Epidemiya artıq yeddi əyalətdə 62 səhiyyə zonasını əhatə edib. Yerli hakimiyyət orqanlarının cümə axşamı bildirdiyinə görə, Sud-Ubangi əyaləti burada Ebola virusuna yoluxma halının təsdiqlənməsindən sonra epidemiyanın yayıldığı ərazilər sırasına daxil olub. Səfər tarixçəsi Cənubi Kivu əyaləti ilə əlaqəli olan 23 yaşlı kişi xəstəlikdən ölüb.

Sud-Ubangi daha əvvəl Ebola hallarının təsdiqləndiyi altı əyalətin heç biri ilə həmsərhəd deyil. Bunlar İturi, Şimali Kivu, Cənubi Kivu, Yuxarı Uele, Tshopo və Aşağı Uele əyalətləridir.

May ayında elan edilən hazırkı epidemiya KDR tarixində ən böyük və ən ölümcül Ebola epidemiyasına, dünyada isə 2014-2016-cı illərdə Qərbi Afrikada baş vermiş epidemiyadan sonra ikinci ən böyük epidemiyaya çevrilib.