Bakı. Trend:

Günəş sisteminin ən kiçik və Günəşə ən yaxın planeti olan Merkurinin zaman keçdikcə kiçildiyi və hətta düşünüldüyündən 10-30 faiz daha çox kiçilmiş ola biləcəyi müəyyən edilib.

Alimlər Merkurinin milyardlarla il əvvəl isti planet kimi formalaşdığını, zaman keçdikcə daxili istiliyini itirərək soyuduğunu və nəticədə kiçilməyə başladığını bildirirlər.

Bu soyuma prosesi planetin qabığında nəhəng qayalı uçurumların və qırışıqların yaranmasına səbəb olub. Uzun müddətdir məlum olan bu strukturlar Merkurinin ölçüsünün kiçildiyinin əsas sübutlarından biri hesab olunur.

Yeni araşdırma asteroid və kometaların toqquşması nəticəsində yaranan qalıq təbəqəsinin Merkurinin səthindəki kiçilmə izlərini gizlətdiyini göstərib.

Alimlər MESSENGER kosmik aparatından əldə edilən məlumatları araşdıraraq səthin nahamarlığı ilə qırışıqlar arasındakı əlaqəni təhlil ediblər.

Aparılan hesablamalara görə, Merkuri əvvəllər təxmin ediləndən 10-30 faiz daha çox kiçilmiş ola bilər.

Merkurinin nə qədər kiçildiyini dəqiq müəyyənləşdirmək alimlərə planetin nəhəng metal nüvəsi və daxili quruluşu haqqında mühüm məlumatlar verə bilər.

Davam edən BepiColombo missiyası çərçivəsində toplanacaq yeni topoqrafik məlumatların Merkurinin kiçilmə dərəcəsini dəqiqləşdirməsi və planetin daxili quruluşu ilə bağlı suallara aydınlıq gətirməsi gözlənilir.