Bakı. Trend:

Azərbaycan Respublikasının Diasporla İş üzrə Dövlət Komitəsinin sədri Fuad Muradov və Azərbaycan Respublikasının Türkiyə Respublikasındakı fövqəladə və səlahiyyətli səfiri Rəşad Aslanov Ankara şəhərində Azərbaycan xalqının ümummilli lideri, görkəmli dövlət xadimi Heydər Əliyevin abidəsini və Türkiyə Respublikasının qurucusu, böyük dövlət xadimi Mustafa Kamal Atatürkün məzarının yerləşdiyi Anıtqəbri ziyarət ediblər.

Bu barədə Diasporla İş üzrə Dövlət Komitəsindən məlumat verilib.

Bildirilib ki, Anıtqəbirdə Mustafa Kamal Atatürkün əziz xatirəsi ehtiramla yad edilib, məzarı önünə əklil qoyulub. Komitə sədri Anıtqəbirdəki xatirə dəftərinə ürək sözlərini yazıb, Atatürkün türk milləti qarşısındakı əvəzsiz xidmətlərini qeyd edib.

Daha sonra Ulu Öndər Heydər Əliyevin abidəsi ziyarət edilib. Abidə önünə gül dəstəsi qoyulub, dahi şəxsiyyətin əziz xatirəsi dərin ehtiram və minnətdarlıq hissi ilə yad edilib. Ziyarət zamanı müasir və müstəqil Azərbaycanın qurucusu Heydər Əliyevin Azərbaycan dövlətçiliyinin möhkəmləndirilməsi, Azərbaycan–Türkiyə qardaşlıq münasibətlərinin inkişafı, ölkəmizin beynəlxalq nüfuzunun artırılması istiqamətində misilsiz fəaliyyəti, zəngin siyasi irsi və xalqımız qarşısındakı tarixi xidmətləri ehtiramla xatırlanıb.