Bakı.Trend:

"Beyond Emerging Europe" nəşri Qazaxıstan Prezidenti Kasım-Jomart Tokayevin Avropa ilə Asiya arasında nəqliyyat əlaqələrinin genişləndirilməsi istiqamətində gördüyü işlərə, eləcə də Qazaxıstanın Orta Dəhlizin (Transxəzər Beynəlxalq Nəqliyyat Marşrutu – TBNM) inkişafındakı roluna həsr olunmuş məqalə dərc edib.

Nəşrdə vurğulanır ki, Prezident Tokayevin Brüsselə səfəri və onun Avropa Komissiyasının Bağlantılılıq Gündəliyi Platformasının fəaliyyətə başlaması mərasimində iştirakı Qazaxıstanın Avropa ilə Mərkəzi Asiyanı birləşdirən alternativ ticarət marşrutlarının inkişafında artan əhəmiyyətini bir daha nümayiş etdirib.

"Beynəlxalq tərəfdaşlıqlar üzrə komissar Yozef Sikela Orta Dəhlizi "Avropa ilə Asiya arasında həyati əhəmiyyət daşıyan körpü" adlandırıb", – deyə məqalədə bildirilir.

Nəşr qeyd edir ki, Brüsseldə keçirilən Qazaxıstan–Aİ dəyirmi masasında Prezident Tokayev ölkənin nəqliyyat infrastrukturuna yatırdığı böyük həcmli investisiyalara diqqət çəkərək bildirib ki, son 15 ildə Qazaxıstan nəqliyyat və logistika sektorunun inkişafına 35 milyard ABŞ dollarından çox vəsait ayırıb.

Məqalədə Prezident Tokayevin Orta Dəhliz üzrə yükdaşımaların həcminin 2019-cu ildən bəri beş dəfə artaraq 4,1 milyon tona çatdığı, Qazaxıstanın isə illik yükdaşımaların həcmini 10 milyon tona çatdırmağı hədəflədiyi barədə fikirlərinə də yer verilib.

"Beyond Emerging Europe" digər nəqliyyat dəhlizlərinin fəaliyyətində yaranan problemlər fonunda marşruta beynəlxalq marağın artdığını da qeyd edir. Bildirilir ki, Yaxın Şərqdəki qeyri-sabitlik və ənənəvi dəniz marşrutlarında yaranan çətinliklər səbəbindən Orta Dəhliz əlavə diqqət mərkəzinə çevrilib.

Nəşrdə qeyd olunur ki, Qazaxıstan Xəzər dənizində gəmiçilik infrastrukturunun inkişafına KTZ Express şirkətinin investisiyaları, eləcə də "Middle Corridor Multimodal təşəbbüsü" çərçivəsində Azərbaycan və Gürcüstanla əməkdaşlıq hesabına logistika imkanlarını genişləndirməyə davam edir.

Eyni zamanda, məqalədə bildirilir ki, marşrut hələ də infrastruktur güclərinin məhdudluğu, etibarlılıq məsələləri və Rusiya üzərindən keçən şimal marşrutu ilə müqayisədə rəqabətqabiliyyətliliyin təmin edilməsi kimi bir sıra çağırışlarla üzləşməkdə davam edir.