Bakı.Trend:

M.V.Lomonosov adına Moskva Dövlət Universitetinin Bakı filialı MDU-nun vahid təhsil məkanının bir hissəsidir. Burada klassik universitet təhsilinin ən yaxşı ənənələri qorunub saxlanılır, tələbələrin akademik, peşəkar və şəxsi inkişafı üçün geniş imkanlar yaradılır.

Tədris MDU-nun təhsil proqramları əsasında həyata keçirilir. Tədris prosesinin əsas hissəsi MDU-nun professor-müəllim heyəti tərəfindən təmin olunur. Təhsili başa vuran məzunlara bakalavr dərəcəsi verilir və dünyanın ən nüfuzlu universitetlərindən biri olan MDU-nun diplomu təqdim edilir.

QS World University Rankings 2027 beynəlxalq reytinqinə əsasən, M.V.Lomonosov adına Moskva Dövlət Universiteti dünyanın ən yaxşı universitetləri arasında 115-ci yeri tutur ki, bu da universitetin yüksək akademik səviyyəsini və beynəlxalq nüfuzunu təsdiqləyir.

Filialın tələbələri beynəlxalq elmi layihələrdə, konfranslarda və xaricdə keçirilən yay dil təcrübə proqramlarında iştirak edərək dəyərli akademik təcrübə qazanırlar. Bundan əlavə, bəzi fakültələrin tədris planlarında Moskva şəhərində üç aya qədər müddətdə daxil edilmiş təhsil nəzərdə tutulur və bununla bağlı bütün xərclər filial tərəfindən qarşılanır.

Filialda müasir təhsil mühitinin yaradılmasına xüsusi diqqət yetirilir. Tələbələr dərs vəsaitləri ilə ödənişsiz təmin olunur, regionlardan gələn tələbələr və xarici vətəndaşlar (müəyyən edilmiş qaydalara uyğun olaraq) müasir tələbə yataqxanasında yerlə təmin edilir. Kampus ərazisində tələbələrin istifadəsi üçün pulsuz idman zalı və tennis kortu fəaliyyət göstərir.

Filiala qəbul imtahanlarından keçə bilməyən abituriyentlər Dövlət İmtahan Mərkəzinin keçirdiyi müsabiqədə iştirak edərək digər ali təhsil müəssisələrinə qəbul olmaq imkanı əldə edəcəklər.

Ərizələrin qəbulu 16 iyun–16 iyul 2026-cı il tarixlərində (daxil olmaqla) elektron formada həyata keçirilir.

Müraciətlər MDU-nun Bakı filialının rəsmi internet səhifəsi və ya Azərbaycan Respublikasının Dövlət İmtahan Mərkəzinin internet saytı vasitəsilə qəbul olunur.