Bakı. Trend:

Azərbaycan Laosla iqtisadi və ticarət əlaqələrinin genişləndirilməsində, qarşılıqlı investisiyaların təşviqində və biznes dairələri arasında birbaşa əməkdaşlığın inkişafında maraqlıdır.

Trend-in tədbirdəki müxbirinin məlumatına görə, bunu iqtisadiyyat nazirinin müavini Anar Axundov çərşənbə günü Bakıda keçirilən Azərbaycan-Laos Biznes Forumunda deyib.

O bildirib ki, Cənub-Şərqi Asiya Azərbaycan üçün artan əhəmiyyətə malikdir və bu regionla əlaqələrin inkişafı ölkənin iqtisadi prioritetlərindən biridir.

“Bu həftə Azərbaycan və Laos əlaqələrində bir sıra mühüm tədbirlər baş tutub. Oktyabrın əvvəlində Kambocada biznes-forum keçirilib, bu gün isə Laosdan olan tərəfdaşlarla görüşmək imkanı yaranıb. Bu, Asiyanın və xüsusilə Cənub-Şərqi Asiyanın Azərbaycan üçün artan əhəmiyyətini əks etdirir”, - deyə nazir müavini qeyd edib.

Onun sözlərinə görə, Asiya ilə Avropa arasında yerləşən Azərbaycan qitələr arasında əlaqələrin gücləndirilməsində mühüm rol oynayır. Qlobal vəziyyətin mürəkkəbləşdiyi bir dövrdə ölkələr və regionlar arasında əməkdaşlığın genişləndirilməsi xüsusi əhəmiyyət kəsb edir.

A.Axundov vurğulayıb ki, Azərbaycanın siyasi və makroiqtisadi sabitliyi, eləcə də etibarlı tərəfdaş kimi mövqeyi beynəlxalq investorların ölkəyə uzunmüddətli marağını dəstəkləyir. O bildirib ki, Azərbaycan insan kapitalının inkişafına, iqtisadiyyatın rəqəmsallaşdırılmasına və süni intellektin tətbiqinə xüsusi önəm verir.

Nazir müavini qeyd edib ki, ölkənin investisiya imkanlarına beynəlxalq maraq artır. Onun sözlərinə görə, aktivlərinin ümumi həcmi 30 trilyon ABŞ dollarından çox olan şirkətlərin nümayəndələri son bir ay ərzində ikinci Azərbaycan Beynəlxalq İnvestisiya Forumunda iştirak ediblər.

“Azərbaycan iqtisadiyyatının müxtəlif sektorlarında beynəlxalq tərəfdaşlarla irimiqyaslı investisiya layihələri həyata keçirilib və bu uğurlar yeni layihələrlə davam etdirilir. Laos şirkətləri də bu imkanlardan yararlanmağa dəvət olunur”, - deyə o bildirib.

A.Axundovun sözlərinə görə, güclü özəl sektorun formalaşması yeni iş yerlərinin yaradılması, müasir texnologiyaların tətbiqi və regionların iqtisadi inkişafı baxımından mühüm əhəmiyyət daşıyır. O, iki ölkənin biznes dairələri arasında tərəfdaşlığın qarşılıqlı fayda gətirəcəyinə əminliyini ifadə edib.

Nazir müavini bildirib ki, Azərbaycanın qeyri-neft iqtisadiyyatı artmaqda davam edir və özəl şirkətlər qeyri-neft sektoruna yatırılan investisiyaların yarıdan çoxunu təşkil edir. Dövlət sahibkarları güzəştli maliyyələşdirmə, kredit zəmanətləri, vergi və gömrük güzəştləri, eləcə də müntəzəm dialoq vasitəsilə dəstəkləyir.

O əlavə edib ki, ixracatçıların nəqliyyat və logistika xərclərinin 70 faizə qədərinin, həmçinin gömrük rəsmiləşdirilməsi xərclərinin bir hissəsinin dövlət tərəfindən kompensasiya edilməsi Azərbaycan şirkətlərinin xarici bazarlara çıxış imkanlarını genişləndirir.

A.Axundov xarici investorlar üçün yaradılan şəraitə də diqqət çəkib. O bildirib ki, Ələt Azad İqtisadi Zonasında xarici investorlar tam xarici mülkiyyət, mənfəətin sərbəst repatriasiyası və yerli tərəfdaşın cəlb edilməsi tələbinin olmaması kimi imkanlardan yararlana bilərlər.

Nazir müavini hesab edir ki, iki ölkənin özəl sektorları arasında birbaşa əlaqələrin gücləndirilməsi konkret investisiya layihələrinin müəyyənləşdirilməsi və biznes təşəbbüslərinin reallaşdırılması üçün vacibdir. Bu baxımdan, ticarət palataları arasında müntəzəm əlaqələrin qurulması şirkətlərin layihələrini inkişaf etdirməsinə kömək edə bilər.

O, Azərbaycanla Laos arasında 30 ildən artıqdır davam edən dostluq münasibətlərinin və siyasi dialoqun iqtisadi əməkdaşlığın genişləndirilməsi üçün möhkəm zəmin yaratdığını bildirib.

A.Axundovun sözlərinə görə, hər iki ölkənin iqtisadiyyatında əməkdaşlıq üçün geniş imkanlar mövcuddur. Laos hidroenerji potensialı, zəngin mineral ehtiyatları, kənd təsərrüfatı və turizm imkanları ilə seçilir. Azərbaycan isə sənaye potensialı, enerji sektoru, nəqliyyat infrastrukturu və yeni iqtisadi sahələrin inkişafı üzrə təcrübəsini tərəfdaşları ilə bölüşə bilər.

Nazir müavini vurğulayıb ki, Azərbaycan emal sənayesinin və yüksək əlavə dəyər yaradan istehsal sahələrinin inkişafına xüsusi əhəmiyyət verir. Bu baxımdan, ölkədə həyata keçirilən yeni mədənçilik və metallurgiya proqramı sənaye potensialının genişləndirilməsi üçün mühüm addımdır.

“Şirkətlərimiz mineral və kənd təsərrüfatı ehtiyatlarının emalı, eləcə də istehsal zəncirlərinin inkişafı istiqamətində əməkdaşlıq edə bilərlər. Laos şirkətləri Azərbaycanda, o cümlədən sənaye parklarında və Ələt Azad İqtisadi Zonasında istehsal müəssisələri yaratmağa dəvət olunurlar”, - deyə o bildirib.

A.Axundov enerji sahəsində də əməkdaşlıq imkanlarının geniş olduğunu qeyd edib. Onun sözlərinə görə, Laosun hidroenerji sahəsində təcrübəsi, Azərbaycanın isə günəş, külək və su elektrik enerjisi istehsalının genişləndirilməsi istiqamətində fəaliyyəti bu sahədə qarşılıqlı təcrübə mübadiləsi üçün imkanlar yaradır. O bildirib ki, bərpaolunan enerji, elektrik şəbəkələrinin idarə edilməsi və enerji səmərəliliyi sahələrində birgə təşəbbüslər həyata keçirilə bilər. Kənd təsərrüfatı sahəsində isə məhsulların emalı, saxlanması, qablaşdırılması və sertifikatlaşdırılması üzrə əməkdaşlıq hər iki ölkənin istehsalçılarının yeni bazarlara çıxışını asanlaşdıra bilər.

Nazir müavini nəqliyyat və logistikanı da perspektivli əməkdaşlıq istiqamətlərindən biri kimi qiymətləndirib. O qeyd edib ki, Laos-Çin dəmir yolu Laosun Çin nəqliyyat şəbəkəsinə inteqrasiyasını təmin edir, Azərbaycan üzərindən keçən Orta Dəhliz isə Çin və Mərkəzi Asiyanı Avropa ilə birləşdirir.

Onun sözlərinə görə, Azərbaycanın nəqliyyat və tranzit infrastrukturu Laos şirkətlərinə Mərkəzi Asiya, Cənubi Qafqaz və Avropa bazarlarına çıxış üçün əlavə imkanlar yarada bilər. Eyni zamanda, Laosun Cənub-Şərqi Asiya Millətləri Assosiasiyasının (ASEAN) üzvü olması Azərbaycan şirkətlərinin də regiondakı biznes imkanlarını araşdırması baxımından əhəmiyyətlidir.

A.Axundov əlavə edib ki, iki ölkə arasında iqtisadi əlaqələrin genişləndirilməsi üçün mövcud siyasi münasibətlərdən və qarşılıqlı iqtisadi üstünlüklərdən səmərəli istifadə olunmalıdır. Bu, yeni investisiya layihələrinin reallaşdırılmasına, ticarət dövriyyəsinin artırılmasına və biznes dairələri arasında uzunmüddətli tərəfdaşlığın qurulmasına töhfə verə bilər.