Bakı. Trend:

Cakartanın əsas beynəlxalq hava limanı və daha üç hava limanı İndoneziyada baş verən vulkan püskürməsi səbəbindən fəaliyyətini bazar ertəsi saat 18:00-dək (Qrinviç vaxtı ilə 11:00) dayandırıb. Bu, on minlərlə sərnişinin təyinat məntəqələrinə gedə bilməməsinə səbəb olub.

Hava limanının idarəedicisi olan Angkasa Pura şirkəti sosial şəbəkələrdə bildirib: «Anak Krakatau vulkanında püskürmə aktivliyinin artması ilə əlaqədar bir neçə hava limanında uçuşlar dayandırılıb. Sərnişinlərə aviaşirkətlərində uçuşlarının statusunu mütəmadi olaraq yoxlamaq tövsiyə olunur».

«Krakatau uşağı» mənasını verən Anak Krakatau vulkanı şənbə günü püskürüb. Püskürmə zamanı lava axını qeydə alınıb və partlayış səsləri bir neçə yüz kilometr məsafədən eşidilib. Vulkanologiya agentliyinin məlumatına görə, bazar günü də yeni püskürmələr baş verib.

Agentlik bildirib ki, bazar ertəsi səhər saatlarına qədər yeni püskürmənin baş vermə ehtimalı yüksək olaraq qalır.

Agentliyin açıqlamasında deyilir: «Püskürmə ilə bağlı təhlükə közərmiş süxurların havaya atılması və böyük miqdarda külün ətrafa yayılması ilə əlaqədardır. Digər potensial risk isə püskürmənin yenidən başlaması və davam etməsi halında lava axınlarının yaranmasıdır».

Bazar ertəsi axşam saatlarına qədər fəaliyyətini dayandıran dörd hava limanı arasında Cakartanın ətrafında yerləşən Soekarno-Hatta Beynəlxalq Hava Limanı, eləcə də Cakartada yerləşən və həm mülki, həm də hərbi uçuşlara xidmət edən daha kiçik Halim Perdanakusuma aviabazası da var.

Nəqliyyat Nazirliyinin bazar günü axşam yaydığı məlumata görə, İndoneziyanın səkkiz hava limanında hava nəqliyyatının bazar günü dayandırılması nəticəsində təxminən 1 558 reys gecikib, 170 min sərnişin isə hava limanlarında qalıb. Təsirə məruz qalan 900-dən çox reys Cakartanın beynəlxalq hava limanına uçuş və ya həmin hava limanından çıxış istiqamətində olub.