Bakı. Trend:

ABŞ İranla münaqişə zamanı həddindən artıq çox silah-sursat sərf edib və bununla da özünü çətin vəziyyətə salıb. Bu barədə ABŞ-ın keçmiş dövlət katibi (2009–2013) Hillari Klinton Hamptons İnstitutunda keçirilən tədbirdə bildirib.

“Biz İranda o qədər çox döyüş sursatı sərf etmişik və əlbəttə ki, [döyüş sursatının] böyük hissəsini [Fars] körfəzindəki müttəfiqlərimizə də göndərmişik. Beləliklə, çətin vəziyyətdəyik, çünki gözlənilməz təhdidlərə adekvat cavab verə bilməyəcəyik <...>. Özümüzü dərin bir çuxura salmışıq”, — deyə o bildirib.

Bundan əvvəl ABŞ mediası İranla münaqişə fonunda ABŞ-ın silah ehtiyatlarının rekord dərəcədə aşağı səviyyəyə çatdığını yazmışdı. Söhbət “Patriot” hava hücumundan müdafiə sistemləri üçün raketlərdən, THAAD kompleksləri üçün raket-interseptorlardan, uzaqmənzilli ATACMS və PrSM raketlərindən gedir.

Avqustun 5-də The Washington Post mənbələrə istinadən yazıb ki, Tramp iyulun 31-də Pentaqonun rəhbəri Pit Heqsetdən ABŞ-ın İranla qarşıdurmada silah çatışmazlığı məsələsində prezidentə niyə yanlış məlumat verdiyini izah etməsini tələb edib. Nəşrin qeyd etdiyi kimi, bu mübahisə ABŞ prezidentinin Pentaqon rəhbərinə qarşı “getdikcə artan narazılığından” xəbər verib. Daha sonra Tramp Heqsetin fəaliyyətindən narazı olduğunu təkzib edib.