Bakı. Trend:

Tacikistan Respublikası üçün enerji keçidi təkcə qlobal iqlim gündəliyinin bir hissəsi deyil, həm də milli inkişaf, enerji təhlükəsizliyi, sənaye artımı və əhalinin həyat keyfiyyətinin yaxşılaşdırılması üçün strateji şərtdir.

Trend-in məlumatına görə, Tacikistanın energetika və su ehtiyatları nazirinin müavini Şərif Səfərəli Məhmədzoda bu açıqlamanı Bakı Enerji Həftəsi çərçivəsində keçirilən Mərkəzi Asiyada bərpa olunan enerji mənbələrinə əsaslanan enerji keçidinin təşviqi üzrə nazirlər dialoqunda verib.

"Tacikistanın unikal təbii üstünlükləri var. Bərpa olunan su elektrik stansiyaları elektrik enerjisi sənayemizin əsasını təşkil edir. Hər il ölkənin elektrik enerjisinin təxminən 95%-i su elektrik stansiyaları tərəfindən istehsal olunur və bu da Tacikistanı yaşıl enerji istehsalında dünya liderlərindən birinə çevirir. Bundan əlavə, ölkənin su elektrik potensialı ildə 527 milyard kilovat-saat qiymətləndirilir ki, bunun yalnız kiçik bir hissəsi - təxminən 4%-i - inkişaf etdirilib", - deyə o bildirib.

Nazir müavini qeyd edib ki, iqlim dəyişikliyi kontekstində su ehtiyatlarından yüksək asılılıq yeni çətinliklər yaradır.

"Buzlaqların əriməsi, çay axınlarında mövsümi dalğalanmalar və elektrik enerjisinə artan tələbat enerji qarışığının şaxələndirilməsini, infrastrukturun modernləşdirilməsini və günəş, külək və digər bərpa olunan texnologiyaların daha geniş tətbiqini tələb edir. Tacikistan Respublikasının 2030-cu ilə qədər Milli İnkişaf Strategiyası konkret meyarlar müəyyən edir", - deyə o bildirib.